ხათუნა ჩაფიჩაძე
სოციალური მეცნიერებების დოქტორი
საქართველოს ტექნიკური უნივერსიტეტი
ასოცირებული პროფესორი
თბილისი, საქართველო
ხათუნა ჩაფიჩაძე
სოციალური მეცნიერებების დოქტორი
საქართველოს ტექნიკური უნივერსიტეტი
ასოცირებული პროფესორი
თბილისი, საქართველო
რუსული მიგრაცია საქართველოში – პროექტი „ახალი ნოვოროსია“ საკითხისათვის
აბსტრაქტი
მოხსენება შეეხება საქართველოში ბოლოდროინდელი რუსული მიგრაციისა და ფაქტობრივად, ერთგვარი რუსიფიკაციის აქტუალური ტენდენციების გააზრებას, რომლებიც მომდინარეობს და/ან გაძლიერდა რუსეთ-უკრაინის ომის პირობებში.
ჩვენ გავაანალიზებთ რუსეთიდან სწორედ ვლადიმერ პუტინის ავტორიტარული მმართველობის შედეგად ზოგადად გაზრდილი ემიგრაციის ჯერ კიდევ საკმაოდ სტაბილურ პროცესს, რაც გამწვავებულია და ატარებს დროდადრო კიდევ უფრო ინტენსიურ ხასიათს - ევროპაში მიმდინარე მეორე მსოფლიო ომის შემდგომი უპრეცედენტო მასშტაბის კონფლიქტიდან გამომდინარე.
ნიშანდობლივია, რომ ზემოაღნიშნულ მიგრაციულ პროცესებს და თანმხლებ რუსიფიკაციის პოლიტიკას თუ, როგორც მინიმუმ, ამგვარი ტიპის მცდელობებს, უპირველეს ყოვლისა, რუსეთის უშუალო სამეზობლოში აქვს ადგილი; სწორედ იმ სამეზობლოში, რომლის მნიშვნელოვანი ნაწილი, მათ შორის საქართველოც, საუკუნეების მანძილზე, პირდაპირ თუ ირიბად, და ამასთან, ირონიულად და პარადოქსულად, - რუსული იმპერიალიზმის გავლენის ისტორიულ არეალს წარმოადგენს და ახლაც - რუსული ოკუპაციის უშუალო მსხვერპლია.
მოხსენებაში, პირველყოვლისა, განვმარტავთ, თუ რას გულისხმობს - ისტორიული „ნოვოროსია“, ე.წ. ახალი რუსეთი და „რუსული სამყაროს“ უფრო ფართო იმპერიალისტური კონცეფცია. შევეცდებით გავარკვიოთ ახალი პროექტის რაობა და მისი პერსპექტივები ცვალებადი მიკრო და მაკრო გეოპოლიტიკური თუ გეოეკონომიკური ფაქტორების გათვალისწინებით, სხვა გარემოებებთან ერთად.
მოხსენება დაეყრდნობა წინააღმდეგობრივ და საკმაოდ რთულად დასადგენ, მათ შორის, საქართველოს სტატისტიკის ეროვნული სამსახურის (საქსტატი) სტატისტიკურ მონაცემებს, ასევე - სხვადასხვა ანალიტიკური ცენტრის და ორგანიზაციის, მაგალითად, ინფორმაციის თავისუფლების განვითარების ინსტიტუტის (IDFI), საერთაშორისო გამჭვირვალობა-საქართველოს და სხვა ინსტიტუციების ანგარიშებს.
მიუხედავად იმისა, რომ პრობლემის მრავალგანზომილებიანი გააზრების პროცესში შეიძლება უკიდურესად რთული იყოს იმის მტკიცება, რომ საქართველოში მიმდინარე უდავო რუსიფიკაციის მცდელობა წინასწარ იყო დაგეგმილი რუსეთის ხელმძღვანელობის მიერ, ასეთი დიდი რაოდენობით - ათასობით და ასობით ათასი რუსი ემიგრანტის რელოკაციის პროცესი, - საგულისხმო - სამხრეთ კავკასიის პატარა სახელმწიფოსთვის, სადაც 2024 წლის 1 იანვრის მდგომარეობით, 3 694 მილიონი ადამიანი ცხოვრობს, ობიექტურად, ნებისმიერ შემთხვევაში წარმოადგენს სხვადასხვა ტიპის საფრთხეს საქართველოს ეროვნული უსაფრთხოებისთვის.
აღსანიშნავია ასევე, რომ, თუმცა საქართველოს ეკონომიკისა და ფინანსების ზოგიერთმა სექტორმა უდავოდ ისარგებლა რუსული ნაკადების, კერძოდ, საშუალო შემოსავლის მქონე ოჯახებისა და ადამიანების შემოდინებით, რომლებმაც განაგრძეს და რიგ შემთხვევებში მნიშვნელოვნად განავითარეს თავისი ეკონომიკური საქმიანობა ახალი დანიშნულების ქვეყანაში, ამავე დროს, ხაზი უნდა გაესვას, რომ ადგილობრივი საცხოვრებელი პირობები ქვეყნის მოსახლეობისთვის არათუ გაუმჯობესდა, არამედ გაუარესდა კიდეც, რაც ცალკე ანალიზის საგანია.
საკვანძო სიტყვები: რუსული მიგრაცია საქართველოში; საქართველო; რუსეთი; პროექტი „ახალი ნოვოროსია“; რუსიფიკაცია.