ლევან ბებურიშვილი

ფილოლოგიის დოქტორი

ივანე ჯავახიშვილის სახელობის თბილისის სახელმწიფო უნივერსიტეტი

ასისტენტ პროფესორი

თბილისი, საქართველო

ORCID: 0009-0008-0270-6302

l.beburishvili@tsu.ge

რაფიელ ერისთავი და ქართველი სამოციანელები
რაფიელ ერისთავი იმ თვალსაჩინო მოღვაწეთა რიგს ეკუთვნის, რომელთაც გარკვეულწილად შეამზადეს საფუძველი ლიტერატურის ასპარეზზე ქართველ სამოციანელთა გამოჩენისათვის. რაფიელ ერისთავი გარდამავალი პერიოდის მწერალია. იგი არც რომანტიკოსთა თაობას ეკუთვნის და არც სამოციანელებისა.  მიუხედავად ამისა, მწერალი ჩვენს ლიტერატურაში არაერთი სიახლის დამამკვიდრებლად მოგვევლინა. ქართველი სამოციანელები დიდი პატივისცემით იყვნენ განწყობილნი რაფიელ ერისთავის მიმართ. არ არის შემთხვევითი, რომ სწორედ ისინი იყვნენ ინიციატორნი მწერლის შემოქმედებითი მოღვაწეობის 50 წლის იუბილეს გადახდისა, რომელიც ეროვნულ დღესასწაულად იქცა. თავიანთ ლიტერატურულ წერილებში თერგდალეულები არაერთხელ შეეხნენ რაფიელ ერისთავის დამსახურებას ქართული ლიტერატურის წინაშე. ილია ჭავჭავაძის შეფასებით, რაფიელ ერისთავმა „შექმნა თავისი საკუთარი სკოლა ხალხური პოეზიისა“, აკაკი წერეთელი რაფიელის მემკვიდრეობას ადარებს „მთასა და ზღვას“, იაკობ გოგებაშვილი კი რაფიელ ერისთავს „მთლიანი პიროვნების“ ისეთ მაგალითად მიიჩნევს, რომელსაც უნდა ბაძავდნენ ახალგაზრდა მწერლები. საკონფერენციო მოხსენებაში სათანადო მემუარული მასალისა და პუბლიცისტური წერილების საფუძველზე განხილული იქნება რაფიელ ერისთავისა და ქართველი სამოციანელების პიროვნულ-ლიტერატურული ურთიერთმიმართების თავისებურებები.
საკვანძო სიტყვები: ქართული ლიტერატურა, რაფიელ ერისთავი, თერგდალეულები.